شارع الحمراء
مسموح اليه النظر في شارع الحمره
ونظرت شفت الزمن مختصر من خصره
انظرت شفت الورد والسمره والشكره
ومحد اليه نظر وتحولت حسره
حسرة شبابي المضت هسا اعرفت سره
وعرفت ليش العمر محترك بالخزره
كاضيهة وسط الزلك ببلادي الخضره
والحزن عدنه فرح والضحكه منتحره
وعدنه الحدايق جثث بالارض منتشره
وان كان في دمشق او بيروت شارع حلو..
ايسمونه الحمره
اشوارعنه سود وغبر
والدم صبغهن حمر
من زاخو للبصره
وارجع واكول الوطن في ناسيه الحره
الله.. يا دمشق يالبلحسن كمره
فيها الصبايا كرز وشفافهن جمره
يا عيني.. يا موطني
ماعرف طعم الهنا متعوب من زغره
عطشان كضه العمر
ونهرين يا صاحبي شايل عله ظهره
في ارضه فضه وذهب
والشعب مثل الحطب
والنار متوجره
شو بس عله موطني متركبه القدرة
باقي البشر امنه
كل واحد ابموطنه
يحسب احساب السنه
ويعرف امد عمره
الباقي عدنه عدل
بالصدفه باقي عدل
يا خوفي من بكره
وارجع واشوف البشر في شارع الحمره
الوان قوس قزح
تمشي وخدهه الفرح
في كل وجه بشره
التين يمشي دلع
التفاح خده يشع
كامل الناصري لعام 2007