(اذا اردت ان تكون شاعرا فكن عراقيا)
طلعنا من حدود النار طبينه ابحدود النار
شاة اوتيها الراعي اوصبح بين الذياب اوبين كصابه
يرد يرجع على احدوده منيته ابشج صايوده
يدري بالمنيه ابشيج صايوده
جدمه احتار مابين الذياب اوخنجر الكصاب
نار ابنار جدمه احتار جدمه احتار
انطلب للكتل والمكتول
ما يدري الفصل المن عشاير باعة الغيره
على المسؤول انطلب للكتل والمكتول
بعد حظ اوبخت مامش خوره اوكضت ما يكدر ايكيش
مبيت ما دره مبيت
عايش ما دره عايش وين ايروح
محتاره الجروح اخياطها مذبوح
وين ايروح تعب جدمه شمر هدمه
سجاجين الغدر مسمومه بظلوعه شله بلمة على الصوبين
ولا صوب الكتب اسمه ولا صوب الحلم حلمه
طلع لا هو عراقي او منتخي الدمه
انطرد ونذبحت الذمه
ليش او بيش يا ام سلمه
ليش او بيش
ليش اوبيش يا خاله
ليش اوبيش ياعمه
قبلتن بالقرار اتوقع ابسمه
بجه حتى اكبر من ضييعه قلمه
الحبر ما يشتعل بالنار
بس يشتعل بالتوقيع
لو وقع بلا ذمه ولا مره ضمير الغرشة حس بالنار
ولا مره تتنها اشتعل للثوار
ولا مرة استحه القمجي جذاب الدمع تمساح من يبجي
ولا خطار ظل بالدار
ولا خطار دش بالدار
نار.. ابنار والسجاد بحواش الظلم مفروض
والكاشات بس مفروض للتجار
وبن عشتار كاعد على نار ابنار
ولا جنه ابن عشتار
نا ابنار او تكول احنه علي الكرار
كفار او اسمها ابسيف ذي الفقار
كفار او عشايرها عشاير عار
كفار او عشايرها تدوور ثار
على البابور كاعد يلدغ الزنبور
ابنص المنكنه محصور
نار ابنار.. نيران او على المعبر
صفة ابنادم خشب ومصطفه التجار
يحز اجثته المنشار نار ابنار
على البابور كاعد يلدغ الزنبور
المرخوانه حلال
او حرم القيثار
نيران اولهبها حصد كومه اسرار
عبرت للخليج اونشفت كل ريج
مات النوخذه وتحير البحار
نار ابنار
من الالف
حد الياء
من الفاء
من الزاء
من الواو
من النون
تيزاب او معه شوف البشر
وتعبه العيون افيون او شرب افيون
اجوا وبحجة الافيون يا حنون
عبرنه على الشين او طلع شو مجنون
نرد عالسين.. ما نكدر علينه اديون
متعلكين ظلينه على الصوبين
لا احنه لهلنه والا لهل خيون
معقولة الخبز يتغسمس ابصمون يا خيون
لا صارت ولا هي اتصير ياخيون
هادة اخر زمان الغاز
يتشلبه على البزون
(طاسه ومكلوبه يانون)
لا صارت ولا هي اتصير يا خيون
حرف العين يتبدل ابحرف النون
بالحضره صفينه اثنين
حارس يحرس الحارس
ايريد ايحرس الفارس
حارس يحرس الحارس
عبرنه اثنينه اوشعبان ثالثنه على الواهس
لكينه النار تاكل نار
نيران اوكلت كل اخضر اويابس
اشمدرينه لكينه الجنة بالمنه
بالدنكينه جهنم شفناها
والجنه ابحلم شفناها يا ساده
واحنه بالحلم ما نقبل الجنه
نار ابنار يا نيران حطب ما ظل بعد بسج
مضايفنه بجت اودلال زعلانه
والهاون فرغ من كهوة الخطار
بجت رنته غفت وبحضن راعيه احترك بشته
اسعود الما غفه فد يوم
اسعود الماغفه مهموم
اسعود الماغفه مهضوم
اسعود الكال يا كبت الذليل الما لفتله اعلوم
اسعود..
او سمه عالمسموم صار اسموم
اسعود الشالته الغيره على غيره
الما عرف فد يوم حنطته تاكل اشعيره
مثل معروف مشهور ابتدابيره
كلبودون الخواجي اسعود
بيرغ ما يهزه الريح
ولا طاح ابشبج غيره
جسر ممدود عالصوبين
خشب سيسم ولا بسمار يندك بيه
كلها اشهود.. بارود او يظل بارود
كلها اشهود بارود او يظل بارود
كريم القزويني / (هولندا)