بهيده من تلمس اجروحك
ولا تغمض كل جفن
ما اجن ايام موتك .. ما تموت
هاي صحوه...
وصحوه النايم نبض
يبعث حياة..
اهلك يسكنون بيتك
ماتهجر حلم الك..
ولا نشفت النهران عازه..
انته بعدك ماطحت..
ما فرحت شمات موتك
انته جرحك.. طعم شمامة
وضحك بوجوه شامت..
حيرت كلمن يريد يبوگ صبحك
وخضرت شمسين للرادك وطن
ياوطنه..
عكز اجروحك علينا ونمشي بيدك
لاخر التاريخ.. هيبه
ونعلك الدنيه شمع يضوي بهواك
مايهمك..
كل قوانين الرذيله شرعت
بسمك... قتل تذهب هباء
وكل نداءات الذبح بسمك هراء
انته .. ابيض ..
غسليت بماي شلال الخليقة
وحضنتك سومر.. واشور
وبده بأسمك حرفهه
انت كلكامش حلمهه
النزع بجفوفك خلوده
وسلمك اعظم بقاء
اظفايرك ترسم فرات ودجلة
من نبعه لمصبه
تغسل هموم السوالف
وتمشي فوك الشك يقين
مايهمك..
ماتهز عبوة غدر دمع الرصايف
ومايعكر صفنتك صوت القذايف
ويبقى خايف..
الراد موتك يبقى خايف
اتلمه حيطان الخرايب
ويمشي ويه الراگ خايب
ويمشي ويه الراگ خايب
نجم عبد خليفة