وبرمشة جفن .. تاه اويه طوله الليل..
صحوة موت اظنها ..؟ لو قدر يسري؟.
ورغم حزني الثگيل .. الما تشيله الروح..
رغم كلشي .. اعله كلشي … وحيرتي بأمري ..
تحزمت بتوالي العمر بحزامين..
كل ظني ارد الضاع من عمري..
آ.. ياقفل سري الزنجرت بالخوف..
زحت زنجار خوفك وانفضح سري..
وتعّبني الوكت بالخوش والموخوش..
وبكل العجايب عشت من زغري ..
ومديت الضلوع ابشحة الماجود..
جسر للما نصفني.. وما عرف گدري..
وصبرت الصبر.. والغانمة چفين..
سحن روحي الصبر.. والفاينة تذري..
ولامتني اعله صبري.. الما تعرف تلوم..
نسوا ماچن صبرهم.. زوده من صبري ..
نسوا من چنت.. چانوا ..ولوفه حيلين..
لساني السيف الهم..والردع صدري
وناغيت البخت.. والنايبة لسانين..
صدعنّي البخت .. والنايبة اتهذري ..
وزين ادري .. البخت ماينغر اعله الحال
طبع اهل الكهف .. والنومه للچمري ..