شباج عينك..
لا تزعل علينه اگلوبنه اتذوب
ما تدري الزعل شيسوي بينه؟
مثل ما تنذبح شمعه بسهم ريح
عصرنه الليل بعدك وانطفينه
گلنالك نحبك تزعل اشبيك؟!
عسه لا گلنه عمي ولا حچينه
مدينتنه ظلام وعينك اهلال
دفك شباچ عينك عالمدينه
يطيحن فوگ ايديك اسنينه ادموع
وغير اوداعك اشطايح بدينه
گمنه انخاف من اعيونك اعليك
گلبك چم نهر گاتلته عينه
لا تضحك ضحكتك ترست البيت
اعيون الگلب تحسد مو أمينه
ولا تبچي اعله خدك ليلو ايطيح
احنه بطرك خدك وانعمينه
اكسر باب گلبي ابعينك وفوت
الما يفتح الك تنشل يمينه
اوگف لا تدك باب الگلب نار
بس اشرلي بيدك وآنه افتحه
كتب گلبك اجروحي ودمعي والآخ
اعله مودك شگگتهن صفحه صفحه
مو حسبالك اضحكلك بطر..لا
ولا آنه الخلي وبجروحي شحه
بس ضميتهن حتى انته ترتاح
وحتى احساس (أحبك) ما اجرحه
فرحني بعد لا تبخل اوياي
اگبالك ما شفت بالدنيه فرحه
خناجر كلهه چانت گبلك الناس
وآخرهم شهك يم گلبي رمحه
أريدك خلك سيف اتجيبلي وياك
وخلك الذكريات البيه اذبحه
حتى أنسه النسوني وسدوا الباب
اشكتبوا.. وشخذوا من بالي امسحه
وأرسمك يم صفنتي اعيونك اتصير
لوحه الما طرت من عدهه لوحه
وندوخ اثنينه وما نصحه للموت
نصحه المن..؟ عمر ما يسوه نصحه
كتب گلبك اجروحي ودمعي والآخ
اعله مودك شگگتهن صفحه صفحه
طباعة
ارسال بالبريد الالكتروني
