تتفانه ابحچيهم تعقد آمال
اتعاشرهم تشوف اشگد عجايب؟
تنظرهم كأنهم أقدس آيات
تنخلهم تجدهم بس شوائب
اصدقهم طلع حچاي وجهين
يحچيلي واصدك وادري چاذب
واشرفهم طعني ابسيف مسموم
انزف مستحه وما گلت اعاتب
صرتلهم جسر واحمل مطبات
داسوني لأجل نيل المطالب
الذيب اتظلمه عنه تگول غدار
سمهم فاق كل سم العگارب
اجمعهم ردت ما طلع مجموع
(كروز) الناتج ابكل المراتب
اهوايه الصفر منهم اغله بهواي
تحترمه لأن بي فد مكاسب
ما الهم رقم احصائي بالناس
من برج همسه ويا كواكب
ما عندي عقل بس املك عيون
أشوف الوادم اخوان وگرايب
وادري الدنيه ساحة حرب وتريد
قاسي انسان في هيئة محارب
وآني أخلاقي درعي وسيفي الحروف
مو بالسيف بالنظرات احارب
بس وكتي ظلمني ابين هالناس
المناسب صار في غير المناسب
مجموعة مشاعر آنه واحساس
مو معصوم آنه ولاني راهب
تعبتني الصداقه واسم الأصحاب
عايش عالأمل واگف وراقب
گلت يمكن أگول اطلعت غلطان
جاوبني الصدى: لا ماكو صاحب